الثلاثاء، ٢٣ آب ٢٠١١

حكمتك يارب ,,



أنا عارفة ما لحقتوا تشتاقوا لبرمي 
بس و الله اللي صار اليوم لازم أحكي عنه 
هاد تدبير رب العالمين ..
أقلكم القصة 

باكجراوند :
هاد محسوبتكم من قريب ال 3 شهور 
(هجت و سابت أمريكا (إذا اللد راحت بدنا نزعل ع هادي
و انتقلت على قرية ألمانية محندقة و لزيزة و فيها علم و أبحاث
و كدولة تعتز بلغتها و ثقافتها من المتطلبات إنك تدرس لغتها 
و ادرس قد ما بدك و اعمل أبحاث قد ما بدك .. أقلك و خد نوبل كمان
بس لو ما نجحت بامتحان اللغة تبعهم ما إلك شهادة من جامعاتهم
اعتزاز ما بعده اعتزاز بلغتهم .. 
فكركم لو كان الألماني لغة الإنجيل كان هلقد اهتموا؟
ولا كان زيه زي لغة القرآن ؟

انترودكشن :
اليوم و أنا في كورس اللغة الألمانية
(معلومة ببلاش: أهم حروف اللغة إخ و إش و طااااخ ههههه )
نفسي الملولة تحدثني و شاغلاني عن اللي بتحاول تعلمني أرطن زيها .. وبتقول :
فكرك شو الحكمة يا ست هديل في إنك هون و بتدرسي ألماني  ؟
يعني شمعنى تسيبي فرجينيا مع إنه القاعات مكيفة و تيجي هون تشوبي و تعطشي في رمضان؟
إيش الحكمة مش هديك البلاد بتحكي اشي بنفهمه ليش وجع القلب ؟
هش هش هش ركزي شوي عشان تعرفي تحلي الهومورك 
أخيراااا خلص الدرس أبو 5 ساعات .. و ماشية في طريقي إلى البيت 
و حاسة حالي الأوبجكت الوحيد الماشي على سطح الكرة الأرضية
وإنه الشمس احتفاء فيّ عاملاني الهدف الوحيد تاع أشعتها الحارقة
طبعا كان نفسي أعيط في الشارع و أقلها و الله مرتبطة (بالمطر) و بحبه حلي عني
بس كبرت عقلي و قلت يا بنت عدنا قطعنا صحراء كلهاري اللي بتزورنا إلها أسبوع
ووصلنا لواحة التخت أبو مخدة نبيتي .. ياااااااه 

لب الموضوع :
ضايل لأدان المغرب ربع ساعة .. كإنه لازم أقوم أسخن الأكل
استني خليني بس أشوف الأخبار - كمان مرة- عشان نطمن على غزة 
و ألاقي :
ضربت هزة أرضية قوتها 5.9 درجة بمقياس ريختر ولاية فرجينيا
له له له .. خالتو الحنونة (فاكرينها؟ اذا لأ فوتوا هون) .. لازم اطمن عليها
و يا حرام صوتها شو متوتر و خايف و هي على الهاي واي و بناتها بالبيت
و مش قادرة تكلمهم الشبكة ما بتلقط معها .. هدّيتها و قلتلها أنا بكلمهم و برجعلك
و الحمد لله لقط الخط معي و كلمت بنتها بالبيت و قالتلي إنهم بخير و قلتلهم ماما ع الطريق
و رجعت طمنت خالتو الحنونة و يا حرام شو انبسطت 
و تقلي إنتي ملاك من عند ربنا إجا يطمني ولا اتصال بيلقط معي إلا منك
و اطمنت لاحقا عليها بس وصلت و الحمد لله كلهم تمام

الكونكلوجين:
كل الأسئلة تعت "شو الحكمة" اللي راودتني في الكلاس اليوم حسيتها بتتمثل قدامي
و بتطلع في و هي مكتفة ايديها و عاملة عليّ أبلة و بترد :
يمكن الحكمة ما تكوني في فرجينيا عشان أهلك و اللي بحبوك (ثقة اه) ما يقلقوا ..
أو يمكن الحكمة تكوني الوسيلة اللي تطمن الإم القلقانة على بناتها الزغار ..
أو يمكن الحكمة تجنيبك الخضة اللي ممكن تحرم البشرية من ذريتك لا سمح الله :p
و يمكن هادول ولا إشي جمب الحكمة الحقيقية اللي مش بالضرورة ربنا يكشفهالك..
بس الإشي الأكيد إنه
ربنا إله حكمة في كل شي و ما بيكتب إلا الخير !
الحمد لله .. الحمد لله .. الحمد لله

هديل
اللي لسة ما حلت الهومورك تاعها :)



هناك ١٩ تعليقًا:

  1. حلي الهوم وورك يا هديل .. حليه
    p:

    ردحذف
  2. ههههههههههههه حبييييييت .. ايس كلام .. وانا بقول في جمل بتكتبيها عالوول ما فهمت معنااااه اتريتو الماني هههههههه ..طب مش برضو حكمة انو انتي لو كنت هناك كان ما صار زلزال .. بسبب تقلك الي حيعمل توازن وما حيهز شي >>> تبرطميش سمعاكي .. ازدي تقلك وقيمتك عند الناس وبقلوبنا .. هع انا طول عمري أؤمن انو كل شي ورا حكمة :) .. عيشــــي ولا تخشي شيئن .. حفظك الله يا اختي <3

    ردحذف
  3. لا انت كلامك ما بيمل الواحد منو , الواحد بجهل حكمة ربنا , بقول يارب ليش بتعمل معي هيك وليش وليش وبالأخر بكتشف ان هادا كلوا لمصلحتوا .....

    ردحذف
  4. اولا حمد الله على سلامة خالتك و سلامتك

    فى ناس بيسمو محافظة الالمان على لغتهم و اهتمامهم شىء من العنصرية
    و انا وجهة نظرى ان اللغة وسيلة من وسائل البقاء و لو اندثرت لغة اندثر شعبها

    تحياتى

    ردحذف
  5. Reem :
    حاضر رح أحله .. تيجي تساعديني :))

    إم مقداد :
    بما أنه هاي أول مرة تشرفي المدونة تعتي فرح أخد حسن النية في موضوع الوزن و التقل :]
    تعي عنا دوما و لا تخشي شيئا :) :)

    سكر زيادة :
    تسلميلي يارب و أنا ما بمل اقرأ ردودكم و تعليقاتكم و الله .. فعلا كل شي بالاخر لمصلحتنا :)

    ابراهيم رزق :
    الله يسلمك يارب شكرا لزوقك :)
    و أنا كمان بسمع من ناس انه تعصب .. صح أنا مش كتير مرتاحة إنه مفروض عليّ أدرسها بس برأيي انه هاد حقهم طالما انت في ارضهم انك تحترمهم و تحترم لغتهم ..

    ردحذف
  6. سبحان الله بنعرف انّه في حكمة دايماً، بس احساسات الفرح و الرّضا ..و الأمان بانّه ربنا هو سبحانه اللي بيدبّرلنا أمورنا، وبيحبنا و بيهتم فينا بترفعنا فوق
    و بتخلّينا نبتسم..

    كنت محتاجة أقرأ هيك اشي عالصّبح..
    اشي طازا :D و بستنّا اللي مخبّا بالدرافتس طبعاً


    نون،اللي بتحبّك

    ردحذف
  7. حكمته بقى يا هديل .. ربنا بيسبب الأسباب ، سبحانه .

    بس قولي لي هي فرجينيا بعيدة عن بنسلفانيا .. اصل اخويا واختي عايشين هناك .. ولا حس ولا خبر ..

    ردحذف
  8. كل سنة و انتى طيبة
    عيد سعيد عليكى

    ردحذف
  9. مساااء الخير وقوووووتن تاك..
    الحمد لله ع سلامتك قرايبك والله يكتب اجرك في معروفك..
    بالنسبة للبوست شكله بوست بحثي.. صحيح اعتزاز الالمان بلغتهم كبير واعتقد معظم الاوروبيين ان لم يكن كلهم نفس الحال.. المشكله فينا نحن لم نخدم لغتنا.. شدني وعجبني البوست واسلوب العرض :).. كل التحايا والاماني

    ردحذف
  10. عزيزتي نون :
    كتير مرات و رغم علمنا بانه دائما ربنا إله حكمة بتلاقينا بنتبرم و بنزعل .. و سرعان ما تغزونا ابتسامة الرضا حال مواجهتنا للخير الترتب على اختيار الله إلنا .. و بخصوص الاشياء فعلا الطازة الها زكاوته و المفرزن بالدرافتس لزمته بعدين :)

    وجع البنفسج:
    أكيد لله حكمة :)
    و بنسلفانيا بعيدة 3 ساعات بالسيارة عن فرجينيا .. ربنا يسلملك حبايبك يارب و يبعد عنهم الشر :)

    ابراهيم رزق :
    و كل سنة و انت طيب و ينعاد عليك و على حبايبك بالخير يارب :)

    gmr14 :
    جوتن تاااج و فعلا انا متاثرة بالابحاث و ترتيبها :)
    الله يهدينا و نعطي كل ذي حق حقه سواء دين او لغة او ثقافة .. سعيدة بمرورك و نورتي المدونة بزيارتك :)

    ردحذف
  11. حبيت امر واقولك كل عام وانت بخير يا هديل ، وينعاد عليك وعلى الأسرة الكريمة بالخير واليمن والبركات .

    ردحذف
  12. تسلمي يارب يا امتياز و كل عام و انتي بالخير و السعادة و كل ما تتمني لنفسك عزيزتي :) :)

    ردحذف
  13. اعتقد انه لازم كمان تدوينة عن الاعصار عشان الصورة تكتمل ... :)
    Ich möchte einen Blog-eintrag

    ;)

    ردحذف
  14. أحاسيس متناثرة :
    انا قلت و الله لو صبرتلي يومين كان حطينا الزلزال و الاعصار في تدوينة وحدة :)

    Wir warten auf Ihre Blog-Beiträge :)

    كيف بنقول كل عام و انت بخير بالدويتشلاندي :)

    ردحذف

  15. أبذل مجهودا كبيرا في فهم اللهجة الشامية .. وفي النهاية لاأفهم غالبا :)

    ردحذف
  16. بداية كل عام وانت بألف خير
    والحمد لله على سلامة خالتك وبناتها وما يشوفوا شر ان شاء الله

    بالنسبة لموضوع الحكمة الإلهية فعلا معك حق ربنا ما بيقدر اشي الا لإنه عارف وين الخير لإلنا والوصول لهاي الدرجة من القناعة بالحكمة الإلهية ما بييجي بسهولة لإنه الإنسان بطبعه فضولي وبيحب يعرف أسباب كل اشي

    موضوع قيم وناقشتيه بطريقة سلسة كتير

    كل التوفيق

    ردحذف
  17. عمار مطاوع :
    بس أنا بفهم لهجتكم كتير منيح .. بيجوز من الأفلام و المسلسلات المصرية اللي كبرنا عليها :)
    سعيدة بمرورك و ان شاء الله بتصير تتقن لغتنا :)

    Rama Rabie:
    و انتي بخير و بالصحة و السلامة و الله يسلمك يارب :)
    مزبوط مو بس طبيعته فضولي و عجول و ما عنده صبر و هدول بدهم مجهود فعلي لمقاومتهم .. سعيدة جدا بمرورك و نورتي المدونة عزيزتي :)

    ردحذف