روحي زغرانة
(هاد المفيد و الباقي فشة خلق على زرار الكيبورد الغلبان)
بدأت القصة من الكوابيس اللي بشوفها إلي يومين
الواحد بينام عشان يرتاح من التفكير يقوم يكوبس و يصحى يفكر
اللهم لا حول و لا قوة إلا بك يارب !
و بعد كابوس آخر صحيت اليوم زهقانة حالي و بديش أروح الكورس تاع اللغة
و بديش أطبع ولا ورقة و بديش اقرأ و لا اكتب و لا غيره
بديش أعمل شي .. :(
و في محاولة لتعديل مزاجي بفكرة حلوة قلت
تعي يا بنت ندوّر على تيكيت نروح عند أهلي في أقرب إجازة
عدّه صارلي سنة ما شفتهم .. و البوبو كبر و أخته و الله اشتقتلها ..
بتروحي بترد روحك و روحهم و لعلها سفرة تحمل معها الخير
و بينما أنا أتنقل بين الديلز و التيكيتات .. و هاد مباشر و هاد ترانزيت
صوت من جوا بيوشوشني و زعلان عليّ
هو انتي نسيتي ؟
شو في ؟؟؟
إنت من الفئة المغضوب عليها "فلسطينية" .. كلمي السفارة كلميها
و اسألي عن الفيزا و شوفي كم مشوار لازم بابا الغلبان يطلع في الشمس
و يبعتوه من شباك لشباك و من مكتب لمكتب و من مسؤول لآخر
عشان خاطر بنته تيجي تطل عليه و على إمها العيانة :(
اااااااه ملء القلب ..
الأفريقي و الاوروبي و الأمريكي و البطيخي
كلهم حلال ياخدوا الفيزا لما يوصلوا المطار
و انا حرام و لازم أدوخ السبع دوخات ؟
تهمتي فلسطينية ؟
و الله أنا لا طبشت حجار على اليهود
ولا حاولت اخترق الجدار
و لا رميت قذائف على حد
تخيلوا حتى إني مش شهيدة !
لا و بعد كل هاد ألاقي خبر بيسم البدن
بطيخ عباس و صاحبه بطيخ فياض أجروا اتصال و عزّوا بيريز بوفاة أخوه
احلف إنت وياه !
ولكوا خلوا عندكم نقطة دم !
اه دم من اللي بينزل من الشهدا على ايد اللي بتعزوه و شلته
كم واحد من الشهدا اتصلتوا تعزوا فيهم ؟
استحيوا لكم شوي !
مش كافي العالم مبهدلنا كمان إنتوا بتسودوا الوجه !
سؤال ع السريع : هو اللي اختار لون جواز السفر الفلسطيني أسود
اختاره من باب الفخامة و الأبهة و ملك الألوان ؟
و لا من باب السخام و سد النفس و طريقكم سودة يا ولاد ؟
و في الختام .. لنا الله !
هديل
فلسطينــــية طفرانــــــة بدها تقدم على الجنسية الزمبابوية .. فكركم بترضى زمبابوي ؟
لنا الله وفلسطين لها الله.
ردحذفدخلك....بعيده هاي زمبابوي....بيوصلها الباص؟؟؟
تصدفي حولت مع زيمباوي و ما رضيو
ردحذفعلى العموم معظم قياداتنا الشريفة و غير الشريفة معها جوازات تانية ( بالاغلب اردنيه) و احنا (طز) فينا
مساء الغاردينيا هديل
ردحذفكل سنة وأنتي طيبة
عنجد تضايقت كتير لكلامك
الله يعينكم بجد سيبي اتكالك على رب العالمين
قادر يرجع لكم حقوقكم "
؛؛
؛
لروحك عبق الغاردينيا
reemaas
اي بني ادم بالعالم بيفكر بالسفر بيكون مستمتع إلا الفلسطينية بيكونوا بيحسبوا كيف المعبر وكيف الروحة وكيف الرجعة
ردحذفومش بس هيك كمان بيصنفوك بالمطار او بالمعبر ازا من غزة او من الضفة او من القدس وكل صنف إله نوع بالمعاملة بس بالاخر كلها بهدلة
ما إلنا غير نوكل أمرنا لربنا
مساء الخير على المعصبين
ردحذفتفضلي حضرتك .. وهدئي من روعك
http://www.youtube.com/watch?v=ybztKiiqRgg
أنا عارفة , ان شاء الله بتفرج عن قريب ....وترجعي على غزة بالسلامة ومن غير طلوع الروح ولف 7 دوخات ..
ردحذفدومتي بخير ومن غير سكر زيادة
رشا
هههههه ، والله انا كارهة السفر بس مشان المعبر ، نصيحتي تنسي فكرة الزيارة هذه خالص ، امحيها من ذاكرتك علشان ما تنكديش على حالك .. بالنسبة للعائلة ، ماله السكاي بي ، عاطل ولا عاطل ؟؟ شوفيهم واحكي معهم ، ولا تعذبي حالك وتضيعي على حالك دراستك لا سمح الله لو رفضوا يرجعوكي ثاني ولا سكر المعبر ، خليك هناك ،، خلصي وروحي بالسلامة بعدين ..
ردحذف""""
سيبك من زيمبابوي ،، مالها بوركينا فاسو ؟؟
naysan :
ردحذفلا مو بعيدة كتير بعد الباص بس بدنا باخرة و بنوصل :P
غير معرف :
له له له حتى هدول ما بيجبونا :(
بلا "قيادة" بلا "شرف" .. انسى ما بيزبطوا مع بعض .. على الأقل هاد اللي شايفاه!
ريماس :
صباحك و مساكي بستان لافندر و كل سنة و انتي طيبة ..
ما كان قصدي اضايقك بس و الله في الحلق غصة ما يعلم فيها الا ربنا .. ادعيلنا امانة :(
راما ربيع :
ردحذفكنت زمان و أنا بغزة أفكر مشكلتي بس اطلع منها بتخلص و لا معاب رو لا ما يحزنون .. اليوم انا مؤمنة لو رحت رحلة على زحل الكائنات الفضائية حتعملي مشاكل .. النا الله فعلا عزيزتي :)
أحاسيس متناثرة :
أول شي زماااااااااان عنك وين هالغيبة :)
هيني هدئت من روعي و حضرت الفيديو اللي بيلطم بشكل حضاري .. سعيدة بمرورك :)
سكر زيادة :
ردحذفيسرني مرورك عزيزتي رشا .. لما نرجع غزة بيصير في بروبليمز تانييييييييين .. يسعد أوقاتك بسكر و بدونه :)
وجع البنفسج :
مشكلتي يا امتياز أهلي مو بغزة أصلا و مشكلتي مش مشكلة معبر ولا رفح و لا مصريين .. مشكلتي لو حكيت فيها رح أضر أهلي و السكوت إجباري .. و على رأيك ماله السكاي بي !!!! الله يديمه نعمة و يحفظه من الزوال !!! أما بوركينا فاسو فسمعت انه القذافي بده يروح هناك فقلت ابعد عن الهبل و اغنيله :)
هديل
ردحذفربك كبير بكرة بأذن الله قريبا و نصلى بالقدس و اتناول زيت الزيتون و لكن من بلد الزيتون
اما عباس و تابعه قفة فليس لى تعليق سوى اذا لم تستحى فافعل اى شىء
تحياتى
صباحكم ود وطيبة هديل
ردحذفوموضوع مؤثر وعسى أن تنحل كل العوائق
والله يكون معكم وعيد سعيد لكم
دمتم بكل خير
مساء الورد هديل
ردحذفوالله العظيم شي مخزي من عباس لهذه الدرجة
وصلت بهم الوقاحة لم يعد للشعب عندهم أي
أعتبار ؟
للأسف أصبحوا قادتنا وصمة عار في جباهنا نحن
الشعوب لنجتر أخطائهم ونحمل وزرها ...
اسأل الله أن يعينك ويعين أخوتنا في فلسطين
تحياتي وإحترامي
ابراهيم رزق :
ردحذفأول مرة سمعت فيها جملة "ان لم تستح فافعل ما شئت " كنت في ابتدائي من معلمة لبنت تطاولت عليها .. يا ترى معلمتي شو رح يكون رأيها بهيك مهزلة ؟
ربنا يسمع منك و من بلد الزيتون نشتري زيته .. تحياتي :)
د.ريان :
شكرا لمرورك و كلامك الطيب ..
دمت بخير .. :)
ريبال بيهس :
مساء الخير عزيزتي ..
"قادتنا" كلمتك وقفتني و مش عارفة أرد !
الله يهدينا و يصلح حالنا و يولي علينا من يخافه يارب ..
سعيدة بمرورك :)