الأربعاء، 2 شباط 2011

دارنا .. بيتنا .. ار هوم




كنت بتالت ابتدائي و قاعدة اعيط و اقلهم كيف بدي امشي لموقف الباص تاع المدرسة ..
 بعيييييد اهئ اهئ اهئ L
كان هذا لما قررنا ننقل من أول بيت وعيت عليه
(الباص كان يجي تحته بالزبط)
اما البيت تاني فبعيد عنه دقيقتين مشي  ..
ما أدلعني !

و البيت التاني هاد عشنا فيه من يومها لعند مبارح ..
يعني على الآلة الحاسبة بيطلعوا 18 سنة ..
من أول ما بابا قال لاقيت بيت ما فيه درج ليتناسب مع وضع ماما الصحي الجديد
و أنا بحاول أجنب نفسي أي احساس ..
ما بقدر أزعل لأنه احنا هيك حنريّح ماما و حتصير طلعتها أسهل ..
و ما بقدر أفرح عشان حكزب عحالي لو قلت هو شقفة بيت و راح ..

..... كتبت هالكلمتين تاني يوم ما نقلنا و خنقني الكلام و ما عرفت اكمل .....

طيب و هلأ ؟

هلأ لما بحلم بأهلي بحلم فيهم ببيتنا القديم !
ولا مرة شفتهم بالجديد ممممم
شكله العقل الباطن مش مستوعب انه "بح"
بس من حقه .. معذور و الله
كل شي صار هناك .. في بيتنا !
حيطانه مسجلة صورنا ..  و زواياه مخبية حواديتنا ..
سقفه لهلأ معاه صداع من صوتنا و ضحكنا و قتالنا ..
متأكدة اللي حيسكنه بعدنا حيعرفنا ..
حيعرفنا اسم اسم .. و حكاية حكاية..
بيتنا حيقله عنا ..
 بيتنا ما حينسانا ..


هديل
(اللي ملهاش نفس تحكي عن السياسة خاااااالص)



هناك 7 تعليقات:

  1. تصدقي انا كمان نفسي ارجع بيتنا
    نفسي اصحى على صوت الجرافات واتفتف عليهم
    واسمع ولاد طنت سميره فايتين طالعين وولاد الشارع الي بلعبو كوره
    والمطبخ والكهربا الي فيه والصلون لما نلتم فيه
    بيتنا هداك احلى واحن واله صور حلوه
    على قولت شهد انا حاسه ان احنا شوي طالعين وحنروح بيتنا
    اشتقتلو والله كتير
    اشتقت انام مطمنه مافي شي مخوفني لا من شباك ولا من غيرو
    بكفي وجعتيلي قلبي :(

    الله يشفي ماما هاد اهم شي

    ام نيمو

    ردحذف
  2. عن جد ياهديل الواحد مل من الكتابة عن السياسة ، نفسه يكتب عن اشي ثاني ، بس السياسة ورانا ورانا ، عموما مبارك البيت الجديد والف سلامة على سلامة امك ، كله يهون المهم ست الحبايب تكون بخير ،، ربنا يعافيها ويشفيها يارب

    ردحذف
  3. السياسة بتوجع القلب هالايام و لكن كلي تفاؤل بالنور القادم ان شاء الله

    مبروك البيت الجديد و ان شاء الله بتشوفو عوجهه الخير كله

    وسلامتها خالتو الف سلامه

    ردحذف
  4. ام ميرو .. فاكرة لما كنت افتح أغنية فيروز "ياريت بنرجع نتلاقى و تفرح فينا الدار " .. أنا عنجد بحس الدار بتعرفنا و بتفرح كانت برجعتنا .. هلأ ما بعرف الجديدة بتفرح ولا لأ .. بس الأكيد رح نعلمها تحبنا متل هديك و حنعلم الياسمينة فيها تشتاق نصحى لنقعد تحتها و كل ما طلعت وردة جديدة تستنى واحد منها يفرح فيها و يعطيها لحدا بحبه .. صح ؟

    وجع البنفسج .. تسلمي لمرورك حبيبتي و ربنا يسمع منك دعواتك الطيبة و الك متلها يارب .. و أنا عنجد سياسة مليييييييت رجعتني لزكريات حرب غزة و الاخبار اللي ما بتسكت لا ليل ولا نهار .. الله يملا هالدنيا سلام كيف ما بعرف بس هو قادر !

    Whisper .. الله يسلمك و يبارك فيك يارب .. عنجد بلا وجع قلب .. عارفة اليوم سكرت صفحة الجزيرة و فتحت فيلم كوميدي !

    ردحذف
  5. والله يا هدولتي الدار مش حتحبنا لنحبها واشك ان سهل نحبها لان لليوم مش لاقين فيها الي بنستناه
    والياسمينه ماعاد حد يزورها اصلا غير كل سنه مره ورح تعاود تغنيلنا ( زوروني كل سنه مره حراااام تنسوني بالمره )
    بس برضو مصيرها تحبنا احنا الي يشوفنا لازم يحبنا اي احنا الكوايكه هههههه

    ردحذف
  6. أزال المؤلف هذا التعليق.

    ردحذف
  7. وردة الدار ..
    المدونة مدونتك و بتشرفيني و الله انتي و كلامك ..
    ححترم رغبتك بحذف الكلام رغم جماله ..
    كنت جاية أعقب عليه :)

    ردحذف