الاثنين، ٢٨ آذار ٢٠١١

ابن عمي البروفيسور ..




ملاحظة:  البتاعة طويلة شوي .. لو الموود بتاعكم زغرانة روحه بلاش تقروا

في بداية الفصل طلب مني الادفايسور قراءة ورقة بحث و بعدها نتقابل مع البروفيسور اللي مشارك فيها ..
(في كلمات ما بحب اترجمها زي ادفايسور لأنها بتصير إما
"المرشد" : و بتزكرني بحسن البنا مؤسس الاخوان المسلمين اللي كانوا ينادوه ب"فضيلة المرشد" ..
أو "الدليل" و كانك بتحكي عن واحد تايه في الصحرا و الدليل البدوي تاعه .. )
ما علينا .. نرجع لموضوعنا .. ورقة البحث
اللي و لعلمي انها مش أولوية حاليا كنت بأجلها لعند ما ألاقي وقت فراغ مناسب
و شاء القدر يجي هالوقت المناسب بعد شهرين و لسة بقول بسم الله الرحمن الرحيم
مين المشاركين في البحث :  مؤسسة اسرائيل للتكنولوجيا في حيفا – الجامعة العبرية في القدس
و محسوبتكم بلمت !

أنا بعرف انه في جامعات اسرائيلية و بعرف انهم بيدرسوا  و ببحثوا
بس مش عارفة ليش نزل عليّ سهم الله و راسي امتلأت بالفراغ المطلق
و قفزت من التبليم اللي انا فيه نحو الكمبيوتر
و بديت ادور على قصة حياة البروفيسور اللي المفروض نقابله
و لاقيت اللي كنت بدور عليه .. بروفيسور اسرائيلي !

اول سيناريو فكرت فيه اني ألغي القصة كلها و اكب الورقة و البحث و بديش القصة هادي كلها
انا اقعد مع ابن الكيان اللي مشردني في بقاع الأرض ؟
ولا ناقصني مثلا بكرة يتهمني الجهلة اني متعاونة مع الاسرائيليين في الجامعات الامريكية ؟
تاني سيناريو يا بنت اعقلي شوي و حطي مشاعرك على جنب و تعاملي بموضوعية بحتة
هاد علم و ناس متعلمة نستفيد منها .. احنا مالنا و مال تاريخه و اصله و فصله

و ضليت الليلة كلها اضرب اخماس في اسداس
حيرانة بين المضي قدما في بحث يتطلب التعامل مع واحد اسرائيلي
 او رمي الموضوع عرض الحائط و استغل الوقت في مشاهدة فيلمين تلاتة
(من اللي بتكون النهاية فيهم البطل يتزوج البطلة .. بلا وجع دماغ )
و نمت بلا قرار ..
و لما صحيت ع الورقة "العلمية" جنبي و نفضت عني غبار النعس
 قلت حكمل هالطريق و أشوف شو آخرتها ..
و تقرر اللقاء مع ابن العم  ..

اليوم كان لقاءنا .. و قبله بساعات
قلبت القصة من تراجيديا و صراع نفساوي إلى كوميديا بحتة
أخد معي حجر ؟ ايش مش اطفال حجارة ولا حقي ناقص ؟
ألبس جاكيتي الرمادي و احط الكوفية ؟ اه خليه يعرف أنا مين؟
طيب أحط سنسال قبة الصخرة ؟ و اكتب على بلوزتي "حتى لا ننسى" ؟
و الز شي اللي قالولي احملي معك علم فلسطين و انتي رايحة
ما صدقتو انتو اه  !

و توجهت مع الادفايسور إلى غرفة "ابن عمي"
(انتو عارفين انه انا ماليش ولاد عم .. كنت محرومة من الكلمة  و ربنا عوضني ههههههههه)
و على عكس ما كان عقلي الباطن الفلسطيني متخيل
لاقيت بروفيسور محترم  بشوش  هادئ  .. و لا عنصري
و ما فيش اي شيء في مكتبه استفزني
لا صورة ولا نجمة و لا شمعدان ولا علم ابيض و ازرق ولا اي شيء!
و كان مهتم بشغله و بموضوع البحث و حريص يفهمني
لدرجة اني اندمجت في الكلام و نسيت جواز سفره من وين !
و اصر اني اعود للسؤال في اي نقطة احس حالي مش متمكنة منها
و "اتفقنا" على لقاء لاحق لتقييم مسيرة البحث
 .............   The End  ..........


و ها أنا أختلي بنفسي و أفكاري تستفرد فيّ من تاني
و بسترجع البتاعات اللي حصلت
و دوشة جوانية مش طبيعية
"شو هاد؟"

هديل



هناك ٢٠ تعليقًا:

  1. اول اشي ما تحسيش بالذنب انك اتعاملتي معه انسانيا وعلميا .. مهو ماكانش المطلوب انك تفجريله مكتبه مثلا :D
    بس كنت متوقعاكي على الاقل زي ما حكيتي .. تلبسي كوفية , اسوارة العلم , تجيبي سيرة البلاد في سياق الحديث ! اي حاجة !
    انا لو محلك كنت هبقى عندي فضول شديد عشان اعرف رد الفعل ايش رح يكون.. وياا ويله (او يا ويلي) لو حكا كلام ما عجبنيش :p
    وبعدين يا هديل انتي مريتي باشي شخضي وعانيتي بسبب الاحتلال .. فا كنتي هاتحكي قصة صارت معك انتي انتي مش حدا تاني .. من حقك يعني
    المرة الجاية لو صار ,, اعملي هيك وطلعي هديل المستفزة شوية بنفعش انسانيتك الزايدة هادي ! انا كنت ما اصدق في بروكسل الاقي دكتور يسألني في السياسة بس لحسن الحظ كانو دايما بيكونو متعاطفين معنا :D

    ردحذف
  2. عارفة يا هديل ذكرتيني لما كنت بفرنسا ،، كانت في الاوبيرج اللي نزلنا فيه واحدة مسؤلة عن الاكل والشرب وكانت يهودية ،اول ماعرفت انه احنا من فلسطين راحت جريت ولبست نجمةداوود " سلسلة في رقبتها " وصرنا نضحك عليها وقلنا لها انه احنا مش مهتمين بانها يهودية وانه عدائنا مع الاسرائيليين اللي احتلوا اراضينا وشردونا ،اما اليهودية كديانة فاحنا ملناش فيها .. وتصدقي انها قامت تبوس فينا وتقولنا انها مش اسرائيلية بل فرنسية يهودية وانها متعاطفة معانا بس كانت خايفة منا انه ناخد موقف منها علشان ديانتها وعلشان هيك بدها تختبرنا وتختبر ردة فعلنا على النجمة ..
    صحيح قصتك وهالقصة مختلفين نوعا ما .. بس مش عارفة ليش خطرت على بالي .. يمكن علشان احنا بنحب نعامل الناس بنوع من الانسانية والموضوعية علشان مايقولوش عنا انه احنا ناس مخنا مقفل ّ^^ مش عارفة .. بس ساعات كثير بنفرض علينا نتعامل مع اشخاص غير مرغوب فيهم وبنتعالى على جراحنا علشان نخرج بأقل الخسائر ، وياستي مادام ماحكاش في السياسة يبقى ما تحكيش في السياسة ، خليكِ في حالكِ وفي علمك احسن ،، وعقبال ما تخلصي الدكتوراة على خير وتكملي وتصير بروفيسورة كمان ..

    ردحذف
  3. علا :
    كنت عارفة التدوينة هاي بالزات لازم تعلقي عليها و إلا مش حتكويب انتي ههههههه ..

    شوفي يا بنتي أنا اللي بفتح معايا سيرة انتي من وين او سيرة السياسة و الله ما بوفر و بحكي عن كل شي ابتداء باللي شفته شخصيا في غزة لعند ما اوصل باي حق يعملولهم دولة على دمنا !

    بس للامانة كوفيتي بلبسها لاني بحبها .. بس عمري ما فكرت ألبسها عشان أشوف ردود الفعل و اجس نبض اللي قدامي من قضيتي ..

    أنا تعمدت التزم الحياد و اعزل احساسي في تعاملي مع البني ادم هاد مش عشان اشي غير انه مش هاد المقام المناسب .. انا تعاملت معه على انه صاحب علم و هدفي منه محدد حاخده و امشي ..


    علا .. و رغم كل اللي قلته فوق لا أخفيك اني حسيت اني مخنوقة و متدايقة بعد اللقاء .. و انا بكتب التدوينة كان راسي بيوجعني .. و ما تساليني ليه !

    ردحذف
  4. وجع البنفسج :
    بالنسبة لليهودية اللي حكيتي عنها حلو انك و صحباتك فهمتوها الفرق في عداءنا لدينهم أو للفكر الصهيوني اللي خرب حياتنا كلنا !

    أنا و مروحة اليوم سرحانة بالدنيا .. بالموقف اللي صار .. بتصرفي .. بقيّم نفسي و بحاسبها .. انا تصرفت صح .. ولا غلطت ! و بطلّع على اللي حواليّ مين فيهم راسه بتلف زيي عشان تعامل مع فلان ؟ مين فيهم همل همّي ؟

    أبدا ما كان تصرفي عشان يقولوا عني اوبن مايندد و مخي مش مقفل لا و الله و لا خطر ببالي لا من قريب و لا من بعيد هالحكي .. و السياسة و حرقة الدم ع بلدي و اللي صارلي فيها و بصير فيها كل يوم ما غاب عن بالي و كل ما يصحلي احكي عنه ححكي .. بس اليوم انا عملت اللي حسيته أنسب للموقف !

    شكرا لمرورك و دعوتك الطيبة امتياز :)

    ردحذف
  5. متحمليش نفسك قوق طاقتك وهل معنى انه اسرائيلي ان الواحد يتجنبه تماما

    هيا الفكرة اني اعرف بيفكروا في ايه وازاي هما متقدمين واحنا لا لكن طبعا بداخلي وفي قرارة نفسي عارف هوا مين وولائه لمين وتعاملي معاه في حدود العلم والدراسة لا أكثر ولا أقل

    __________

    خالص تحياتي
    Casper

    ردحذف
  6. ابن عمك خطف استضاف اخي من اسبوع بسجن المجدل
    **احمد**

    ردحذف
  7. كاسبر :
    يعلم الله انه تعامللي معاه ما غيّر موقفي من الصهيونية و اتباعها و ما انساني قيد انملة المعاناة اللي عشتها و اعيشها بسبب وجودهم .. شكرا لدعمك و نصيحتك :)

    **أحمد**:
    فك الله أسر أخوك و كل أسرانا يارب و يعودوا سالمين لأهاليهم و يطمنكم عليه :(

    ردحذف
  8. سبحان الله ياحبيبتي لكم دينكم ولي دين الرسول كان بيتعامل مع المشركين مش بس يهود

    ردحذف
  9. عزيزتي كارمن :
    القصة مش اختلاف ديانة ابدا و الله .. انا تعاملت مع ديانات كتير و ما عمره كان عندي مشكلة .. بس فكرة انه من الكيان الصهيوني (الاحتلال) هي اللي تعبتني شويتين :)

    سعيدة بمرورك :)

    ردحذف
  10. هديل :

    كتير عجبني موقفك و انك كنتي محايدة بس أكيد عرف انك عربية , مرة قرأت أنو الشعوب الي ما بتقدر تأخدوا بالحروب بتأخدوا بالثقافة .

    الله يحميك

    رشا

    ردحذف
  11. مالك يابنتي خليتيني احس اني بتفرج على فلم ولاد العم عنجد
    لهدرجه بتسرحي انتي
    بتتزكري لما كنا نزهق بشو نسرح طول الليل لهدرجه الوحده عملت فيكي فلم مصري نهايته غريبه ههههههه
    ديري بالك على نفسك مابتعرفي شو مستنيكي بس خلي ثقتك بالله ال عمليله وما بعرف شو شكلك متقله عالعشا او مش متعشيه

    ام فرافيرو

    ردحذف
  12. رشا:
    من الأمور و التي أؤمن بها و بشدة شديدة انه بلدنا متل ما هي محتاجة اللي يحارب و يدافع و يحرر محتاجة كمان اللي يبنيها بعلم و فهم و يحط اسمها في المحافل العلمية .. اللهم لا تكلنا الى انفسنا طرفة عين ..
    سعيدة بمرورك عزيزتي :)

    ام فرافيرووو :
    مالك يا حجتي شو عملت انا هههههه .. انتي مفكرة انه هاد سرحان ؟؟؟؟ و الله انك طيبة و على نياتك و قعدتك مع اطافيلك خلتك بريئة زيهم .. و عذراكي لانه ما وقفك الافندي ابو لحية اللي عباب معبر ايرز و قلك و هو رافع حاجب و منزل التاني "شو بتعملي في امريكا الك سنتين؟" و لا أصر يفتش السيديهات تعتك بعدها !!!

    ردحذف
  13. مرحبا

    ابقولك شغله هو قريب لك تعاملي معه عادي و ين المشكلة
    لأجل صلة الرحم والقرابة

    أما من ناحية الدين وغيره .. الخ ، هاي الشي انتي مالك دخل فيه وبينه وبين ربي أن كان تغير لاقدر الله

    صحيح اننا كعرب نستفز من كثير من الشغلات ولكن في لحظات يجب ان نقف و نتريث ونفكر .

    اسعدك الباري
    :
    عبدالله

    ردحذف
  14. عبد الله :
    بتسميتي له "ابن عمي" هي سخرية و تهكم بحت ..
    أبدا لا يمت لشعوري بصلة ..
    و أوافقك الرأي لابد من وقفة للتفكير قبل الإقدام على أي خطوة ..

    سعيدة بزيارتك :)

    ردحذف
  15. اختى الفاضلة

    من عرف لغة قوم امن شرهم لذلك يجب ان نتعامل معهم و نحاول ان نصحح بعض مفاهيمهم الخاطئة و هذا اضعف الايمان

    نقطة ثانية مع احترامى للكوفية و كافة الرموز الا انى اخشى من ان تتحول القضية الى رموز سرعان ما تتلاشى و عمنا قواد حداد بيقول ان الفجر لمن صلاه

    اما امل دنقل فبيقول

    لا تصالح ولو منحوك الذهب
    اترى حين افقا عينيك
    ثم اثبت جوهرتين مكانهما
    هل ترى ؟
    هى اشياء لا تشترى

    خالص تحياتى و اتمنى زيارتك فى مدونتى المتواضعة

    ردحذف
  16. هديل مش عارفة اش اقلك ردة الفعل ع هيك مواقف بتختلف من شخص لشخص حسب اندفعاتو و مقدار او مدة بين قوسين " التبليمة " اللي صابتك لمن سمتي انو يهودي يعني الواحد منا بحكي رأيو بس بنفس الوقت يمكن رأيو ما يطبقوا بساعة ماهو ينحط بالموقف
    بس أنا رأيي باختصار ياهديل لمن قريت التدوينة فكرت ببالي لو انا متلا كنت متخاصمة مع صديقتي وصار انو احتجت منها شغلة ياترى عزة نفسي بتخليني اروح أطلب منهاطلبي مع اني متخاصمة او متحاربة بالبلدي معها ؟؟ والله انو اللي بلاحظو ياطماطم انو احنا الفلسطينية ألايطة ونادر ماتحصل عناولاشو رأيك ؟؟ بس حتى لو كنت غلطانة وكانت هديل ما بتمانع انها تطلب طلبها من صديقتها فأكيد ما حتطلبوا الا بعد ما تكون تعبت ودروت على هالطلب عند صحباتها اللي باقيين ومالقتو ولا بردو انا غلطانة ؟؟
    بتمنى تكوني فهمتي وجهة نظري :)))

    ردحذف
  17. ابراهيم رزق :
    أحييك أخي على اختيارك لكلمات قليلة تحمل اعمق المعاني .. كن على ثقة أنني ساحرص دوما على صلاة الفجر و على عينان من الله لا من ذهب ..
    يشرفني مرورك و يشرفني ان اتعرف على مدونتك :)

    وردة الدار:
    فاهمة عليك كتير منيح بس الوضع يختلف تماما .. أنا لست بحاجة إليه و الكبرياء هو مشكلتي .. هو و أنا و الاستاذ الثالث يحتاجنا البحث .. و هدفنا اتمام البحث .. مشكلة اكبر من الكبرياء !
    يسعدني مرورك و تعليقك عزيزتي .. دايما تعي عنا :)

    ردحذف
  18. على فكرة هما ولاد عمنا من بعيد ولا لأ :)؟
    وبعدين لازم ناخد الأمور ببساطة شوي.. يعني في علم وبحوث واشي زي هيك .. العرق والجنس والانتماء ما الو دخل إلا اذا حد اساء اللي ولمعتقداتي بسير حكي تاني

    ردحذف
  19. d3mha :
    اسم المدونة "تهكم" على هيك ولاد عم ..
    مع اني ما دورت بشجرة العيلة بس اعتقد انه في منه الحكي :)
    و انا اتفق معك لو حد طبّ من قريب و لا بعيد في معتقداتي حقلب على الوش التاني :)

    ردحذف
  20. ممممم فعلا موقف ليه وجهة نظر مختلفه والوضع لا تحسدي عليه

    ولكن هاد علم اتوقع من ال1ذكاء اننا نفهم كيف بيفكرو وكيف وصل بيهم العلم والتقدم والافكار منشان نقدر نواجههم ونحاربهم

    صدقيني الحروب مش بس بالاسلحه الحروب ممكن تكون بالتكنلوجيا والعلم والتقدم

    فكيف نحنا راح نصدى الهم وما بنعرف ابسط شيء تطوراتهم العلميه لازم نكون علي نفس المستوى العلمي و الثقافي

    اتوقع احنا مشغولين بكيف نحارب ومافكرنا كيف نتشغل علي كيف نطورحالنا بالاول ومش غلط لو اخدنا واستفدنا وتعلمنا من الاعداء

    اتوقع هاد بيكون قمة ذكاء لو انا ماكانك كنتت عملت نفس الشيء بناء علي حكى هاد

    ردحذف